ବାରିପଦା: ଗୁରୁବାର ମାଧପୁର ଐତିହାସିକ ହରିହାଟ ମହୋତ୍ସବ ଉଦଯାପିତ ହୋଇଯାଇଛି l ଶେଷ ଦିବସରେ ଭାଗବତ ଗୋସେଇଁ ଙ୍କ ଠାରେ ଭାଗବତ ମହାପୁରାଣ ସମ୍ପୂର୍ଣ୍ଣ ପାଠ ସରିଥିଲା l ପ୍ରଚଳିତ ପରମ୍ପରା ମୁତାବକ ଅପରାହ୍ନ ରେ ରାଧାକୃଷ୍ଣ ଙ୍କ ନଗର ପରିକ୍ରମା ପରେ ଦଧି ହାଣ୍ଡି ଭଙ୍ଗାନୀତି ସମ୍ପନ୍ନ ହୋଇଥିଲା l ମାଘ ମାସ ଶୁକ୍ଳ ପକ୍ଷ ତ୍ରୟୋଦୋଷୀ ତିଥି ଠାରୁ ଚାରିଦିନ ବ୍ୟାପୀ ମାଧପୁର ବ୍ରାହଣ ଶାସନ ରେ ଚାଲିଥିବା ଏହି ହରିହାଟ ମହୋତ୍ସବରେ କୃଷ୍ଣ ପ୍ରେମରେ ସମସ୍ତେ ତଲ୍ଲୀନ ହୋଇ ଭାଗବତ ଗୋସେଇଁଙ୍କ ଠାରୁ କୃପା ଭିକ୍ଷା କରିଥିଲେ l ଶେଷରେ ପୂର୍ଣ୍ଣାହୁତି ପରେ ଘଣ୍ଟ ଘଣ୍ଟା, ମୃଦଙ୍ଗ ଓ ଶଙ୍ଖ ହୁଳହୁଳି ଦେଇ ଭାଗବତ ଗୋସେଇଁଙ୍କ ଯଥାରୀତି ବାହୁଡା଼ ବିଜେ ନୀତି ସମ୍ପନ୍ନ ହୋଇଥିଲା l ଶେଷ ଦିବସରେ 137 ତମ ହରିହାଟ ମହୋତ୍ସବରେ ସାମିଲ ହୋଇ ଭାଗବତ ଗୋସେଇଁ ଙ୍କ କୃପା ପାଇବା ପାଇଁ ଭକ୍ତଙ୍କ ପ୍ରବଳ ସମାଗମ ହୋଇଥିବା ଦେଖିବାକୁ ମିଳିଥିଲା l ଚାରିଦିନ ଧରି ଆନନ୍ଦ ବଜାରରେ ଅନ୍ନଛତ୍ର ଚାଲି ଥିବା ବେଳେ ପୂର୍ଣ୍ଣାହୂତି ପରେ ରାତିରେ ଶେଷ ଅନ୍ନ ଛତ୍ର ବଣ୍ଟନ ହୋଇଥିଲା l ମାଧପୁର ପଞ୍ଚାୟତ ସମେତ ପାଖାପାଖି ଗାଁ ଗଣ୍ଡାର ଲୋକମାନେ ଏଥିରେ ସାମିଲ ହୋଇଥିବା ବେଳେ ବାରିପଦା ଏବଂ ବାହାରୁ ଅନେକ ଶ୍ରଦ୍ଧାଳୁ ଏହି ହରିହାଟ ମହୋତ୍ସବରେ ସାମିଲ ହୋଇ ଥିଲେ l ଏହି ଐତିହାସିକ ମହୋତ୍ସବ ପାଇଁ ମାଧପୁର ବ୍ରାହ୍ମଣଶାସନର ଘରେ ଘରେ ଅତିଥି ଅଭ୍ୟାଗତ ପ୍ରିୟ ପରିଜନଙ୍କ ଭିଡ଼ ଲାଗିରହିଥିଲା l
ଚାରି ଦିନ ଧରି ଅନୁଷ୍ଠିତ ଏହି ନିଆରା ମହୋତ୍ସବ ରେ ଭାଗବତ ଗୋସେଇଁ ଶୁକ୍ଳ ପକ୍ଷ ତ୍ରୟୋଦୋଷୀ ତିଥି ସୋମବାରରେ ଅଗଣିତ ଭକ୍ତଙ୍କୁ ଦର୍ଶନ ଦେବା ନିମିତ୍ତ ଦାଣ୍ଡି ବିଜେ ହୋଇ ବେଦୀରେ ସୁସଜ୍ଜିତ ଆସ୍ଥାନ ରେ ବିରାଜମାନ କରିବା ପରେ ଚଳିତ ବର୍ଷର ଏହି ଐତିହାସିକ ମହାପର୍ବ ଆରମ୍ଭ ହୋଇଥିଲା l ପ୍ରଥମ ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ସହିତ ପାଲା ପରିବେଷଣ ହୋଇଥିବା ବେଳେ ଦ୍ଵିତୀୟସନ୍ଧ୍ୟାରେ ବଛା ବଛା କଣ୍ଠ ଶିଳ୍ପୀଙ୍କ ଦ୍ୱାରା ଭଜନ ପରିବେଷଣ ପରେ ପ୍ରସାଦ ସେବନ କରାଯାଇଥିଲା l ସେହିପରି ତୃତୀୟ ସନ୍ଧ୍ୟାରେ କଂସ ମହାରାଜଙ୍କ ନଗର ପରିକ୍ରମା ସହିତ ରଙ୍ଗମହଲ, କଂସ ଦରବାର, ଅଗ୍ନି ଉତ୍ସବ ସମ୍ପନ୍ନ ପରେ ପ୍ରସାଦ ସେବନ ହୋଇଥିବା ବେଳେ ଶେଷ ସନ୍ଧ୍ୟାରେ ଭାଗବତ ଗୋସେଇଁ ଙ୍କ ବାହୁଡା଼ ନୀତି ସମ୍ପନ୍ନ ପରେ ପ୍ରସାଦ ବିତରଣ ଓ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା l ଏଠାରେ ଉଲ୍ଲେଖ ଯୋଗ୍ୟ ଯେ, ଉତ୍କଳୀୟ ପରମ୍ପରା ରେ ପୂର୍ବରୁ ଗାଁ ଗାଁ ରେ ଭାଗବତ ଟୁଙ୍ଗୀ ମାଧ୍ୟମରେ ଆଧ୍ୟାତ୍ମିକ ଓ ସାଂସ୍କୃତିକ ଭିତ୍ତିଭୂମି ପ୍ରତିଷ୍ଠା ହେଉଥିବା ବେଳେ ଆଜି ସେ ସବୁ ବିରଳ ପ୍ରାୟ l ମାତ୍ର ମୟୂରଭଞ୍ଜ ଜିଲ୍ଲା ବଡ଼ସାହି ବ୍ଲକ ଅନ୍ତର୍ଗତ ମାଧପୁର ବ୍ରାହ୍ମଣ ଶାସନ ଏହି ପରମ୍ପରା ରୁ କେବେ ବିଚ୍ୟୁତ ହୋଇ ନାହିଁ l ଏଠାରେ 137 ବର୍ଷ ଧରି ଏହି ନିଆରା ସାଂସ୍କୃତିକ ପରମ୍ପରା ବଜାୟ ରହି ଆସିଛି l ଯାହା ଏକ ସମୃଦ୍ଧ ସାଂସ୍କୃତିକ ଆଧ୍ୟାତ୍ମିକ ତଥା ଐତିହାସିକ ଧରୋହର ହୋଇ ଅତୀତର ଇତି କଥାକୁ ବୟାନ କରୁଛି l
