ଭୁବନେଶ୍ଵର: ଗେଷ୍ଟ ଫ୍ୟାକୋଲ୍ଟି ଭରସାରେ ଚାଲିଛି ଓଡିଶାର ନାମକରା ବିଶ୍ବବିଦ୍ୟାଳୟମାନ । ୧୭ଟି ବିଶ୍ବବିଦ୍ୟାଳୟରେ ୯୬୩ ଜଣ ଗେଷ୍ଟ ଫ୍ୟାକୋଲ୍ଟି ପଢ଼ାଉଛନ୍ତି । ଆଜି ବିଧାନସଭା ବଜେଟ୍ ଅଧିବେଶନର ଦ୍ଵିତୀୟ ଦିନ । ମାତ୍ର ସୁରୁଖୁରୁରେ ଚାଲିପାରୁନାହିଁ ଗୃହ କାର୍ଯ୍ୟ । ଦୁଇ ଦୁଇ ଥର ମୁଲତବୀ ହେଲାଣି ଗୃହ । ଏହାରି ଭିତରେ ବିଧାୟକ ଅରବିନ୍ଦ ମହାପାତ୍ରଙ୍କ ପ୍ରଶ୍ନରେ ଲିଖିତ ଉତ୍ତର ରଖିଛନ୍ତି ଉଚ୍ଚ ଶିକ୍ଷା ମନ୍ତ୍ରୀ ।
ଓଡିଶାର ବିଭିନ୍ନ ନାମକରା ବିଶ୍ବବିଦ୍ୟାଳୟ ମାନଙ୍କରେ ପଢାଉଛନ୍ତି ଗେଷ୍ଟ ଫ୍ୟାକୋଲ୍ଟି । ଉତ୍କଳରେ ୫୯ ଜଣ ଗେଷ୍ଟ ଫ୍ୟାକୋଲ୍ଟି ପଢାଉଥିବା ବେଳେ ରେଭେନ୍ସାରେ ୮୯, ସମ୍ବଲପୁରରେ ୬୪, ରାଜେନ୍ଦ୍ର ବିଶ୍ବବିଦ୍ୟାଳୟରେ ୧୧୩, ବିକ୍ରମଦେବରେ ୭୮, ଗଙ୍ଗାଧର ମେହେରରେ ୬୧, ଖଲ୍ଲିକୋଟରେ ୬୩, ରମାଦେବୀରେ ୮୧ ଜଣ ଗେଷ୍ଟ ଫ୍ୟାକୋଲ୍ଟି ପଢାଉଛନ୍ତି ।
ସେହିପରି ୧୭ ବିଶ୍ବବିଦ୍ୟାଳୟରେ ଖାଲି ପଡ଼ିଛି ୧୩୦୭ ପ୍ରଫେସର ପଦବୀ । ଉତ୍କଳରେ ୧୩୬ ଟି ପ୍ରଫେସର ପଦବୀ ଖାଲି ପଡିଥିବା ବେଳେ ରେଭେନ୍ସାରେ ୧୫୭ଟି, ଖଲ୍ଲିକୋଟରେ ୧୧୨ଟି, ରାଜେନ୍ଦ୍ରରେ ୧୦୬ଟି, ଧରଣୀଧରରେ ୧୧୧ଟି ପ୍ରଫେସର ପଦବୀ ଖାଲି ପଡିଛି ।
