କଟକ: କଟକରେ ଖୋଲିଲା ସର୍ଵ ବୃହତ ବିଜୁ ପଟ୍ଟନାୟକ ପାର୍କ । ୨୬ କୋଟି ଟଙ୍କା ବ୍ୟୟରେ ପୁନଃନିର୍ମାଣ ପରେ ସୋମବାର ଦିନ ଏହି ପାର୍କକୁ ଲୋକାର୍ପିତ କରିଛନ୍ତି ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ମନ୍ତ୍ରୀ କହିଛନ୍ତି ଯେ ଏହି ପାର୍କ କଟକବାସୀଙ୍କ ପାଇଁ ଏକ ଉପହାର । ଆମେ ଫିଟନେସ୍, ସୁସ୍ଥତା ଏବଂ ପରିବେଶଗତ ସ୍ଥାୟୀତ୍ୱକୁ ପ୍ରୋତ୍ସାହିତ କରୁଥିବା ବିଶ୍ୱସ୍ତରୀୟ ସହରାଞ୍ଚଳ ସ୍ଥାନ ବିକାଶ କରିବାକୁ ପ୍ରତିବଦ୍ଧ । ପାର୍କର ପ୍ରମୁଖ ଆକର୍ଷଣ ମଧ୍ୟରୁ ଗୋଟିଏ ହେଉଛି ୧.୫ କିଲୋମିଟରର ସିନ୍ଥେଟିକ୍ ରନିଂ ଟ୍ରାକ୍, ଯାହା ଫିଟନେସ୍ ଉତ୍ସାହୀମାନଙ୍କୁ ସେବା ଯୋଗାଇବ ।
CDA ଉପାଧ୍ୟକ୍ଷ ଅନାମ ପାତ୍ର କହିଛନ୍ତି ପାର୍କରେ ସୁସ୍ଥତାକୁ ପ୍ରୋତ୍ସାହିତ କରିବା ପାଇଁ ଏକ ଧ୍ୟାନ କେନ୍ଦ୍ର ସ୍ଥାପନ କରାଯାଇଛି । ସୌନ୍ଦର୍ଯ୍ୟ ବୃଦ୍ଧି କରିବା ପାଇଁ ସ୍ୱତନ୍ତ୍ର ଭାବରେ କ୍ୟୁରେଟେଡ୍ ବନସାଇ ପ୍ଲାଣ୍ଟ ମଧ୍ୟ ସ୍ଥାପନ କରାଯାଇଛି। ସେହିପରି ପାର୍କ ମଧ୍ୟରେ ଅତ୍ୟାଧୁନିକ ଇପିଡିଏମ୍ ୱାକିଂ ଟ୍ରାକ୍, ୧୦ଟି ୱାଟର ଫାଉଣ୍ଟେନ୍, କୋରାପୁଟ କଫି ସେଣ୍ଟର, ପିଲାଙ୍କ ଖେଳପଡ଼ିଆ, ମୁକ୍ତାକାଶ ଜିମ୍, ସିଟିଂ ବେଞ୍ଚ, ରେନ୍ ରେଷ୍ଟ ସେଡ୍ , ଲାଇଟ ଆଦି ବ୍ୟବସ୍ଥା କରାଯାଇଛି ।
ଏହି ପ୍ରକଳ୍ପଟି ଜାତୀୟ ପ୍ରକଳ୍ପ ନିର୍ମାଣ ନିଗମ (NPCC) ଦ୍ୱାରା କାର୍ଯ୍ୟକାରୀ କରାଯାଇଥିଲା । ପାର୍କର ରକ୍ଷଣାବେକ୍ଷଣ ବଜାୟ ରଖିବା ପାଇଁ, ଉତ୍ସର୍ଗୀକୃତ ସଂସ୍ଥାଗୁଡ଼ିକୁ ନିୟୋଜିତ କରାଯାଇଛି ବୋଲି ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର କହିଛନ୍ତି ।
ପ୍ରକାଶ ଯେ ପୂର୍ବ ବିଜେଡି ସରକାର ସମୟରେ ୨୦୨୩ ମସିହାରେ ନବୀକରଣ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା ।
