ନୂଆଦିଲ୍ଲୀ: ଅକ୍ଟୋବର ୧୦ରେ ରାଜଧାନୀରେ ବଡ଼ ପ୍ରତିବାଦ! ଛାତ୍ରଛାତ୍ରୀଙ୍କୁ ଆନ୍ଦୋଳନରୁ ଦୂରେଇ ରହିବାକୁ ପରାମର୍ଶ, ବସ୍ରୁ PG ହଷ୍ଟେଲ୍ ପର୍ଯ୍ୟନ୍ତ ପୋଲିସର କଡ଼ା ନଜର। ଦିଲ୍ଲୀରେ ଆନ୍ଦୋଳନକୁ ରୋକିବା ପାଇଁ ପ୍ରସ୍ତୁତି ଜୋରଦାର! ଚାରିଆଡ଼େ ସୁରକ୍ଷା ବ୍ୟବସ୍ଥା, ରାସ୍ତାରେ ପୋଲିସର ନଜର, ସୀମାରେ ଯାଞ୍ଚ ଏବଂ ଆନ୍ଦୋଳନସ୍ଥଳରେ ଅତିରିକ୍ତ ଫୋର୍ସ ମୁତୟନ। ଅକ୍ଟୋବର ୧୦ରେ କକ୍ରୋଚ୍ ଜନତା ପାର୍ଟି (CJP) ପକ୍ଷରୁ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ହେବାକୁ ଥିବା ପ୍ରତିବାଦ ପୂର୍ବରୁ ରାଜଧାନୀରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।
ରିପୋର୍ଟ ଅନୁସାରେ, କେନ୍ଦ୍ର ସରକାର ଦିଲ୍ଲୀ ପୋଲିସକୁ ୨୨୧ କମ୍ପାନୀ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ (CAPF) ଯୋଗାଇ ଦେଇଛନ୍ତି। ଏହି ମୁତୟନରେ ପ୍ରାୟ ୨୩ ହଜାର ଯବାନ ସାମିଲ ଥିବା କୁହାଯାଇଛି। ଏହା ସହ ଦିଲ୍ଲୀ ପୋଲିସର ପ୍ରାୟ ୧୫ ହଜାର କର୍ମଚାରୀ ମଧ୍ୟ ମଇଦାନରେ ମୁତୟନ ହେବାର ଯୋଜନା ରହିଛି। ଜମ୍ମୁ-କାଶ୍ମୀର, ପଶ୍ଚିମବଙ୍ଗ ଓ ଛତିଶଗଡ଼ରୁ ମଧ୍ୟ ଅତିରିକ୍ତ ଫୋର୍ସ ଅଣାଯାଇଛି। ଅକ୍ଟୋବର ୮ରୁ ୧୨ ତାରିଖ ମଧ୍ୟରେ ଏହି ଫୋର୍ସ ଦିଲ୍ଲୀ ପୋଲିସକୁ ସହଯୋଗ କରିବ।
କେବଳ ଯବାନ ମୁତୟନ ନୁହେଁ, ଏଥର ପୋଲିସର ନଜର ରହିବ କ୍ୟାମେରାରେ ମଧ୍ୟ। ପ୍ରାୟ ୧୫୦ଟି ବଡିକ୍ୟାମ୍ ପୋଲିସ କର୍ମଚାରୀଙ୍କୁ ଦିଆଯାଇଛି। ଏହି କ୍ୟାମେରା ମାଧ୍ୟମରେ ଆନ୍ଦୋଳନକାରୀ ଓ ପୋଲିସ ମଧ୍ୟରେ ହେଉଥିବା କଥାବାର୍ତ୍ତା କିମ୍ବା ଧସ୍ତାଧସ୍ତିର ଭିଡିଓ ରେକର୍ଡ ରଖାଯାଇପାରିବ। ଅକ୍ଟୋବର ୨ରେ ଜନ୍ତରମନ୍ତରରେ ହୋଇଥିବା ପ୍ରତିବାଦ ସମୟରେ ତିନି ଜଣ ମହିଳା ସାମ୍ବାଦିକ ପୋଲିସ ବିରୋଧରେ ଦୁର୍ବ୍ୟବହାର ଓ ଯୌନ ଉତ୍ପୀଡ଼ନ ଭଳି ଅଭିଯୋଗ ଆଣିଥିଲେ। ପୋଲିସ ଏହି ଅଭିଯୋଗକୁ ଖଣ୍ଡନ କରିଥିଲା। ଏଭଳି ପରିସ୍ଥିତିରେ ବଡିକ୍ୟାମ୍ର ରେକର୍ଡ ଘଟଣାର ପ୍ରମାଣ ଭାବେ ସହାୟକ ହୋଇପାରେ।
ଜୁଲାଇରେ CJP ପକ୍ଷରୁ ହୋଇଥିବା ଆନ୍ଦୋଳନରେ ସାମିଲ ହୋଇଥିବା ପ୍ରାୟ ୨,୮୦୦ ଜଣଙ୍କୁ ମୁହଁ ଚିହ୍ନଟ ପ୍ରଣାଳୀ (Facial Recognition System) ମାଧ୍ୟମରେ ଚିହ୍ନଟ କରାଯାଇଥିବା ନେଇ ରିପୋର୍ଟରେ କୁହାଯାଇଛି। ପୋଲିସର ଦାବି ଅନୁସାରେ, ସେମାନଙ୍କ ମଧ୍ୟରୁ କେତେକଙ୍କର ଅପରାଧିକ ପୂର୍ବ ରେକର୍ଡ ରହିଛି। ଅକ୍ଟୋବର ୧୦ ପୂର୍ବରୁ ସେମାନେ ଦିଲ୍ଲୀ ଆସୁଛନ୍ତି କି ନାହିଁ, ତାହା ଉପରେ ଥାନା ଅଧିକାରୀମାନଙ୍କୁ ନଜର ରଖିବାକୁ କୁହାଯାଇଛି।
