ମେଲବୋର୍ଣ୍ଣ: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୟୁରାନିୟମ୍ ଯୋଗାଣକୁ ନେଇ ଏକ ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହୋଇଛି। ମେଲବୋର୍ଣ୍ଣରେ ଆୟୋଜିତ ଦ୍ୱିପକ୍ଷୀୟ ବୈଠକ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆଣ୍ଟୋନି ଆଲବାନିଜ୍ ମିଳିତ ସାମ୍ବାଦିକ ସମ୍ମିଳନୀରେ ପ୍ରତିରକ୍ଷା, ବାଣିଜ୍ୟ, ଶକ୍ତି, ମହାକାଶ ଏବଂ ଗୁରୁତ୍ୱପୂର୍ଣ୍ଣ ଖଣିଜ କ୍ଷେତ୍ରରେ ଅନେକ ସହଯୋଗୀ ଚୁକ୍ତି ଘୋଷଣା କରିଛନ୍ତି।ବୈଠକ ପରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଭାରତ ଏବଂ ଅଷ୍ଟ୍ରେଲିଆ ମିଳିତ ଭାବେ ଏକ ଗୁରୁତ୍ୱପୂର୍ଣ୍ଣ ଖଣିଜ କରିଡର ବିକଶିତ କରିବେ।
ସେହିପରି କୋକୋସ୍ (କିଲିଂ) ଦ୍ୱୀପପୁଞ୍ଜରେ ଏକ ମହାକାଶ ଟ୍ରାକିଂ ଟର୍ମିନାଲ ସ୍ଥାପନ କରାଯିବ, ଯାହା ଭାରତର ଗଗନଯାନ ମିଶନ ପାଇଁ ସହାୟକ ହେବ।ମୋଦୀ ୧୬ ବର୍ଷରୁ କମ୍ ବୟସର ପିଲାମାନଙ୍କ ପାଇଁ ସୋସିଆଲ ମିଡିଆ ବ୍ୟବହାର ଉପରେ ଅଷ୍ଟ୍ରେଲିଆର ନୀତିକୁ ପ୍ରଶଂସା କରିଥିଲେ। ପରେ ସେ ମେଲବୋର୍ଣ୍ଣରେ ପ୍ରାୟ ୩୦,୦୦୦ ଭାରତୀୟ ସମୁଦାୟର ସଦସ୍ୟଙ୍କୁ ସମ୍ବୋଧନ କରିଥିଲେ।ଏହି ଚୁକ୍ତି ପରେ ଅଷ୍ଟ୍ରେଲିଆ ଭାରତକୁ ୟୁରାନିୟମ୍ ଯୋଗାଣ କରୁଥିବା ପଞ୍ଚମ ଦେଶ ହୋଇଛି। ୟୁରାନିୟମ୍ ପରମାଣୁ ଶକ୍ତି ଉତ୍ପାଦନ ସହିତ ପରମାଣୁ ପ୍ରଯୁକ୍ତି ପାଇଁ ଏକ ଅତ୍ୟନ୍ତ ଆବଶ୍ୟକ ଇନ୍ଧନ।ପ୍ରଧାନମନ୍ତ୍ରୀ ମୋଦୀ ଭାରତ–ଅଷ୍ଟ୍ରେଲିଆ ସମ୍ପର୍କକୁ କ୍ରିକେଟ ସହ ତୁଳନା କରି କହିଥିଲେ, “ଦୁଇ ଦେଶର ସମ୍ପର୍କ କ୍ରିକେଟ ପରି। ଆମର ବୈଠକ ଏକଦିନିକିଆ ମ୍ୟାଚ୍ ପରି ସୁପରିକଳ୍ପିତ, ନିଷ୍ପତ୍ତି ଟି–୨୦ ପରି ଦ୍ରୁତ ଏବଂ ସହଭାଗୀତା ଟେଷ୍ଟ ମ୍ୟାଚ୍ ପରି ଦୀର୍ଘସ୍ଥାୟୀ ଓ ଦୃଢ଼। ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆଣ୍ଟୋନି ଆଲବାନିଜ୍ କହିଛନ୍ତି ଯେ ୨୦୧୫ ଭାରତ–ଅଷ୍ଟ୍ରେଲିଆ ପରମାଣୁ ସହଯୋଗ ଚୁକ୍ତି ଅନୁଯାୟୀ ଭାରତକୁ ୟୁରାନିୟମ୍ ରପ୍ତାନି ପାଇଁ ଏକ ବ୍ୟବସ୍ଥାରେ ସ୍ୱାକ୍ଷର କରାଯାଇଛି। ଏହା ଦ୍ୱାରା ଉଭୟ ଦେଶର କୌଶଳଗତ ସମ୍ପର୍କ ଆହୁରି ସୁଦୃଢ଼ ହେବ ବୋଲି ସେ କହିଛନ୍ତି।
ଏହାଛଡ଼ା, ଉଭୟ ଦେଶ Australia–India Cyber, Critical Technology and Supply Chain Partnership (PACTS) ଆରମ୍ଭ କରିବାକୁ ସମ୍ମତ ହୋଇଛନ୍ତି। ଏହି ସହଭାଗୀତା ଅଧୀନରେ କୃତ୍ରିମ ବୁଦ୍ଧିମତ୍ତା (AI), କ୍ୱାଣ୍ଟମ୍ କମ୍ପ୍ୟୁଟିଂ, ସେମିକଣ୍ଡକ୍ଟର, ସାଇବର ସୁରକ୍ଷା ଓ ଡିଜିଟାଲ୍ ସ୍ଥିତିସ୍ଥାପକତା କ୍ଷେତ୍ରରେ ମିଳିତ ଗବେଷଣା ଏବଂ ପ୍ରଯୁକ୍ତି ସହଯୋଗକୁ ବଢ଼ାଯିବ।
ଏହି ଚୁକ୍ତିଗୁଡ଼ିକ ଭାରତ–ଅଷ୍ଟ୍ରେଲିଆ ସମ୍ପର୍କକୁ ନୂଆ ଉଚ୍ଚତାରେ ପହଞ୍ଚାଇବା ସହ ଇଣ୍ଡୋ–ପ୍ରଶାନ୍ତ ଅଞ୍ଚଳରେ ଉଭୟ ଦେଶର କୌଶଳଗତ ଭାଗୀଦାରିକୁ ଆହୁରି ସୁଦୃଢ଼ କରିବ ବୋଲି ଆଶା କରାଯାଉଛି।
