ଭୁବନେଶ୍ୱର : ଓଡ଼ିଶା ଲେଖକ ସମବାୟ ସମିତି ପକ୍ଷରୁ ଏହାର ମାସିକ ସାରସ୍ୱତ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି। ଏହି ଅଧିବେଶନରେ ଓଡ଼ିଆ ସାହିତ୍ୟ ଆକାଶର ଦୀପ୍ତିମନ୍ତ ନକ୍ଷତ୍ର, ‘ଉତ୍କଳ ଭାରତୀ’ କୁନ୍ତଳା କୁମାରୀ ସାବତଙ୍କ ବହୁମୁଖୀ ପ୍ରତିଭା ଓ ଓଡ଼ିଆ ସାହିତ୍ୟକୁ ତାଙ୍କର ଅତୁଳନୀୟ ଅବଦାନ ସମ୍ପର୍କରେ ଗଭୀର ଆଲୋଚନା କରାଯାଇଛି।
ଏହି ସାରସ୍ୱତ ସମାରୋହରେ ବିଶିଷ୍ଟ ସାହିତ୍ୟିକା ଡକ୍ଟର ପ୍ରେମଲତା ଦେବୀ ସଭାପତିତ୍ୱ କରିଥିଲେ । ମୁଖ୍ୟ ଅତିଥି ଭାବେ ବିଶିଷ୍ଟ ଲେଖିକା ବନଜଦେବୀ ଯୋଗଦେଇ କୁନ୍ତଳା କୁମାରୀଙ୍କ ଜୀବନୀ ଓ ସାହିତ୍ୟିକ କୃତି କିପରି ସମାଜରେ ଏକ ନୂତନ ଜାଗରଣ ସୃଷ୍ଟି କରିଥିଲା, ସେ ସମ୍ବନ୍ଧରେ ଆଲୋକପାତ କରିଥିଲେ। ଡାକ୍ତରୀ ବୃତ୍ତିରେ ଥାଇ ମଧ୍ୟ ସେ କିପରି ସାହିତ୍ୟ ମାଧ୍ୟମରେ ସ୍ୱାଧୀନତା ସଂଗ୍ରାମ ଓ ସମାଜ ସଂସ୍କାର ପାଇଁ ସ୍ୱର ଉତ୍ତୋଳନ କରିଥିଲେ, ତାହା ବକ୍ତାମାନଙ୍କ ଆଲୋଚନାର ମୁଖ୍ୟ ବିଷୟବସ୍ତୁ ରହିଥିଲା।
ସମ୍ମାନିତ ବକ୍ତା ଓ ଆଲୋଚକ ଭାବେ ପ୍ରଭାତ କୁମାର ନନ୍ଦ, ମିନତୀ ଷଡ଼ଙ୍ଗୀ, ମନୋଜ ଜେନା, କ୍ଷେତ୍ର ମୋହନ ଦାଶ, ନିଶାକର ରାଉତ ଏବଂ ନିବେଦିତା ତ୍ରିପାଠୀ ଯୋଗଦାନ କରିଥିଲେ। ଆଲୋଚକମାନେ କୁନ୍ତଳା କୁମାରୀଙ୍କ କବିତା, ଉପନ୍ୟାସ ଓ ପ୍ରବନ୍ଧ ଗୁଡ଼ିକରେ ଥିବା ଜାତୀୟତାବୋଧ, ମାନବିକତା ଏବଂ ନାରୀ ସଶକ୍ତିକରଣର ସ୍ୱରକୁ ବିଶ୍ଳେଷଣ କରିଥିଲେ। ଓଡ଼ିଆ ଭାଷା ଓ ସାହିତ୍ୟକୁ ସମୃଦ୍ଧ କରିବାରେ ତାଙ୍କର ବୈପ୍ଳବିକ ଭୂମିକା ଆଜିର ପିଢ଼ି ପାଇଁ ପ୍ରେରଣାର ଉତ୍ସ ବୋଲି ସେମାନେ ମତବ୍ୟକ୍ତ କରିଥିଲେ।
କାର୍ଯ୍ୟକ୍ରମର ପ୍ରାରମ୍ଭରେ ରଶ୍ମିତା ରାଉତ ଏବଂ ପୂର୍ଣ୍ଣ ଚନ୍ଦ୍ର ଶାସନୀଙ୍କ ଦ୍ୱାରା ଅତି ସୁଲଳିତ କଣ୍ଠରେ ଜଗନ୍ନାଥ ଭଜନ ଗାନ କରାଯାଇଥିଲା, ଯାହା ସଭାସ୍ଥଳରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିଥିଲା। ପରିଚାଳକ ରମାକାନ୍ତ ମିଶ୍ର ଅତିଥିମାନଙ୍କ ପରିଚୟ ପ୍ରଦାନ କରିବା ସହ ସ୍ୱାଗତ ଭାଷଣ ଦେଇଥିଲେ ଏବଂ ସମଗ୍ର ସଭା କାର୍ଯ୍ୟକୁ ସୂଚାରୁରୂପେ ପରିଚାଳନା କରିଥିଲେ। ସମିତିର ସମ୍ପାଦକ ସୁକାନ୍ତ ପ୍ରଧାନ ଶେଷରେ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ଏହି ଆଲୋଚନା ଚକ୍ରରେ ବହୁ ସଂଖ୍ୟାରେ ସାହିତ୍ୟ ପ୍ରେମୀ ଓ ବୁଦ୍ଧିଜୀବୀ ଯୋଗଦେଇ ଉତ୍କଳ ଭାରତୀଙ୍କ ସ୍ମୃତି ଚାରଣ କରିଥିଲେ।
